الألعاب في نظام لينكس ماي 19, 2009
Posted by makkay in ألعاب لينكس, سلسلة برامج لينكس.2 تعليقان
أغلب الألعاب الكبيرة والمعروفة على البي سي مصممة تعمل على نظام ويندوز .. بس مو يعني مافيه ألعاب على نظام لينكس فيه ألعاب كشخة .. القصد إذا كنت من جماعة محبي لعبة معينة أو بعض ألعاب البي سي على ويندوز بس تذكر إنها احتمال كبير ما تشتغل على نظام لينكس .. هذي بعض المواقع عن ألعاب لينكس ارجع ليها
موقع ubuntu gamers arena مراجعات .. صور .. معلومات مفصلة عن ألعاب لينكس المجانية والتجارية
موقع the linux games tome جميع ألعاب لينكس وآخر أخبارها وإصداراتها مع معلومات وتقييم للألعاب
موقع libregamingwiki ويكي لتغطية كل ماله علاقة بالألعاب الحرة/مفتوحة المصدر
موقع linux gamers guide ويكي عن ألعاب لينكس
ابحث في جوجل عن linux games أو عن best linux games
^^ مثل ما تشوفوا فيه مئات الألعاب .. ما يمدي نتكلم عنهم كلهم وحتى بعضهم بايخين وأنا أصلاً ما ألعب وايد ولا أعرف ألعب أغلبهم .. بس بكتب عن بعض الألعاب الكول اللي جربتها فيه غيرهم بعد حليوين يمكن أكتب عنهم إذا جربتهم أكثر الحين بكتب عن اللي جربتهم واختبرتهم
..
ألعاب الإنترنت
ألعاب فلاش تشتغل على نظام لينكس بإستخدام مشغل فلاش flash player مثل ألعاب ابحث في جوجل عن كلمة flash games
ألعاب جافا تشتغل على نظام لينكس بإستخدام جافا .. مثل ألعاب موقع هذا الموقع حاطين ألعاب العائلة القديميين هذي لعبة ماريو
بعض الألعاب مصممة بإستخدام javascript و php ولغات أخرى هذي ما تحتاج أي إضافة لتشغيلها تشتغل مباشرة في المتصفح مثل اللعبة البايخة travian واللعبة التمام typeracer
ملاحظة بعض الألعاب الأونلاين تتطلب نظام تشغيل معين فما راح تشتغل على لينكس إذا ما كانت اللعبة تدعم النظام
..
لعبة neverball ولعبة neverputt ( لقطات شاشة – مقاطع يوتيوب – الموقع الرسمي – ويكيبيديا )
مرة كشخة هاللعبة .. يبون تحرك الأرضية اللي تحت الكورة يمين ويسار فوق وتحت بإستخدام لوحة المفاتيح أو الماوس أو حتى بالـ sensors مدري شسمهم هالأجهزة مثل هذا تجمع رقم معين من الفلوس عشان تنتقل من مستوى لمستوى .. فيها خمسة مستويات (من مبتدئ إلى محترف) كل مستوى كل مستوى فيه 20 لعبة
اللعبة الثانية neverputt أختها .. مثل الجولف تضرب الكورة عشان تدخلها في الفتحة تقدر تلعبها كلعبة جماعية واللي يدخل الكورة بلمسات أقل يفوز
إذا أدمنت اللعبة موقع nevercorner موقع مخصص لهالعبة تقدر تحمل منه مستويات إضافية وتسجيل أرقامك القياسية ومشاركتها مع بقية مستخدمي اللعبة في مسابقة nevertable
..
لعبة secret maryo canonicals (لقطات شاشة – الموقع الرسمي– ويكيبيديا)
لعبة تقليد لماريو بس مو مثلها 100% بالضبط .. اللعبة فيها عدة عوالم (10 عوالم حسب موقعهم بس الظاهر ما كملوهم كلهم للحين اللعبة تحت التطوير) .. كل عالم فيه مستويات مختلفة .. تقدر تحفظ المستوى اللي وصلت له إذا كان عندك 3000 نقطة .. اللي يحركوا الأسهم وalt و ctrl اللي عاليسار والمسافة .. إذا تبي تآخذ نظرة سريعة على اللعبة من هنا .. أو شاهد هالفيديو في نهاية الصفحة
..
لعبة frozen bubbles (لقطات شاشة – الموقع الرسمي – ويكييبديا)
هذي أذكر كنت ألعبها أيام الشسمه على الجوال حليوة اللعبة يعني وبسيطة .. على الكمبيوتر تقدر تلعبها بعد على شبكة محلية أو أونلاين مع لاعبين مختلفين من الإنترنت أو لاعبين مع بعض على نفس الجهاز .. اللعبة حليوة يعني وحتى التصاميم والمظهر العام والصوت ليها مرة حليوين
واضح من الصورة يبونك تطلق الكرة على نفس الكرات اللي بلونها عشان تنتقل للمستوى الثاني فيه 100 مستوى .. هذي اللعبة في وضع الأونلاين تتسابق ويا بقية اللاعبين
..
لعبة teeworlds (مقاطع يوتيوب – الموقع الرسمي – ويكيبيديا)
لعبة أونلاين فيها عدة ألعاب مختلفة بس بشكل عام فيه فريقين أحمر وأزرق أو كل واحد يلعب لحاله من دون فريق .. يبونك تقتل الخصم قبل ما يقتلك فيه عدة أسلحة كل سلاح طلقاته مختلفة .. فيها شات إذا تبي تتكلم مع فريقك .. ايه وتقدر بعد تعمل سرفر خاص فيك (لازم تعمل سرفر مو مثلاً غرفة) وتحط عليه كلمة سر إذا تبي تلعب مع ناس معينيين وتقدر تختار نوع اللعبة وتصمم خريط اللعبة وقوانينها إذا عملت لك سرفر .. فيه ناس مسويين لهم جماعات clans ويعملون تحديات بين بعض يعني الحركة حليوة
مرة حليوة لكن صعبة كله يغلبوني ولا مرة فزت ):
..
لعبة pingus (مقطع يوتيوب – لقطات شاشة – الموقع الرسمي – ويكيبيديا)
طريقة اللعب نوعاً ما سهلة يبونك تتحكم في البطاريق مثلاً في لعبة معينة لما تضغط على بطريق راح يحفر أو يسوي شيء معين بس انتبه لا تخليهم يطيحوا بقوة لأنه يموتوا يبونك في النهاية تخلي عدد معين من البطاريق يوصلوا للمخرج بالبداية راح تحس اللعبة لليهال ومرة بسيطة بس بعدين فيها مستويات مرة صعبة
ايه بعد لا أنسى المستويات الموجودة في اللعبة (أقصد في الواجهة الرسومية) كلها بسيطة وعددها 22 تدريب و 8 صعبة شوي (المستويات الحقيقية عددها أكثر من 300) مو حاطين كل المستويات في الواجهة الرسومية مدري ليش؟!! (يمكن لأنه ما اختبروهم بشكل كامل؟) .. المهم إذا تبي تلعب بقية المستويات اللي مو موجودة اكتب في الطرفية
pingus /usr/share/games/data/pingus/levels/choose-your-level
^^ ادخل على هالمجلد واختار من المجلدات مستوى معين تبي تلعبه مثلاً
pingus /usr/share/games/pingus/data/levels/playable/mauern.pingus
ما أعرف طريقة ثانية عشان تلعب المستويات اللي مو حاطينها في الواجهة الرسومية .. أحد يعرف طريقة أحسن؟ |:
تقدر بعد تحمل مستويات إضافية (ابحث في جوجل pingus levels) من الإنترنت وانسخهم إلى هالمجلد والعبهم بالطريقة السابقة وتقدر تصمم مستوى بنفسك من خيارeditor
..
لعبة wormux (مقاطع يوتيوب – لقطات شاشة – الموقع الرسمي – ويكيبيديا)
فكرة اللعبة فيه فريقين (أو أكثر) أول شيء يلعب الأول يختار سلاح ويهاجم الثاني وبعدين دور الثاني يهاجم تقدر تتحرك داخل الخريطة بالأسهم أو إذا جاء دورك اختار الأدوات اضغط على زر الماوس الأيمن واختار السلاح اللي تبيه كل سلاح له مميزات وعيوب لتفاصيل أكثر هنا .. ممكن يلعبها أكثر من شخص على نفس الجهاز أو على الشبكة أو على النت كل فريق يتكون من عدد معين من اللاعبين مو شرط كل فريق له نفس عدد اللاعبين كل واحد يحدد عدد اللاعبين اللي يبيهم .. إذا تبي خرائط إضافية ابحث في جوجل عن wormux maps
..
لعبة xmoto (مقاطع يوتيوب – الموقع الرسمي – ويكيبيديا)
المطلوب منك تحرك اللاعب اللي على السيكل (بإستخدام الأسهم والمسافة تقلب اتجاه اللاعب) وتآكل الفراولة الموجودة في اللعبة وبعدين تلمس الوردة .. السيكل يتحرك بطريقة صعبة نوعاً ما تحكم فيه بحيث ما تخلي راس اللاعب يلمس الأرضية .. اللعبة فيها مستويات وايد وإذا كان عندك نت تقدر تحمل مستويات إضافية من داخل اللعبة نفسها بس اختار update تقدر بعد تصمم مستويات بنفسك بإستخدام البرنامج الموجود في موقعهم الرسمي
..
لعبة numpty physics ( الموقع الرسمي)
استخدم الماوس وارسم أشكال عشان تحرك الكرة الحمراء لتلامس النجمة .. فيه لعبة لويندوز مثلها بس ما أعرف اسمها |:
إذا خلصت كل المستويات حمل مستويات إضافية من هنا
..
ألعاب gnome وألعاب kde (موقع gnome games – موقع kde games)
مشروع gnome ومشروع kde يطوروا برامج من كل الأنواع لواجهتهم من هالبرامج الألعاب .. أغلب الألعاب من هالمشروعين ألعاب بسيطة ومعروفة بس ذكرناها هنا لأنها في العادة تأتي افتراضياً مع التوزيعة اللي تستخدمها حسب الواجهة اللي اخترتها (مو شرط بعض التوزيعات تحذف الألعاب)
صورة لبعض ألعاب واجهة gnome تأتي افتراضياً مع أوبنتو
..
محاكيات emulators
أنا ما جربتهم بس لا تتوقعهم راح يشغلوا الألعاب كأنك تلعبهم على الجهاز الأصلي لأنه من إسمهم محاكيات يمكن محاكي نظام dos يشغل كل أو أغلب ألعاب dos بس مثلاً تحصل محاكي جيد لـ wii مالك أمل
wine & crossover & cedge & playonlinux لتشغيل ألعاب لينكس ( crossover و cedega مو مجاناً)
pcsx لتشغيل ألعاب playstation 1
pcsx2 لتشغيل ألعاب playstation 2 راجع هنا بالعربي أول مرة p:
dolphin لتشغيل ألعاب gameboy و wii
mupin64 & mupin64plus لتشغيل ألعاب nintendo 64
openmsx لتشغيل ألعاب كمبيوتر صخر
dosbox & dosemu لتشغيل ألعاب نظام dos
visualboyadventure لتشغيل ألعاب gameboy
قائمة بمحاكيات أجهزة الألعاب من ويكيبيديا .. إذا ما حصلت محاكي للجهاز اللي تبحث عنه ابحث في جوجل اسم الجهاز + linux + emulator
بعض الصور للمحاكيات الصور سرقتهم من مدونة haythoo وهالموقع
لعبة neverball ولعبة neverputt ماي 16, 2009
Posted by makkay in ألعاب لينكس.add a comment
لعبة neverball (ويكيبيديا – الموقع الرسمي – لقطات شاشة – مقاطع يوتيوب) لعبة حرة مفتوحة المصدر ومجانية .. مرة كشخة اللعبة حرك الأرضية اللي تحت الكرة يمين ويسار فوق وتحت بإستخدام لوحة المفاتيح أو الماوس تجمع رقم معين من الفلوس عشان تنتقل من مستوى لمستوى .. فيها خمسة مستويات (من مبتدئ إلى محترف) كل مستوى كل مستوى فيه 20 لعبة .. يمكن أيضاً تصميم ألعاب جديدة في الموقع الرسمي مذكور يوجد 141 مستوى للعبة neverball و134 مستوى للعبة neverputt
اللعبة الثانية neverputt أخت neverball مثل لعبة جولف وتستخدم نفس التقنيات الموجودة في لعبة neverball .. المطلوب تدخل الكرة في الفتحة لتنتقل للمستوى الثاني ممكن تلعبها كلعبة جماعية واللي يدخل الكرة بأقل لمسات يفوز
إذا أدمنت اللعبة موقع nevercorner موقع مخصص لهالعبة تقدر تحمل منه مستويات إضافية وتسجيل أرقامك القياسية ومشاركتها مع بقية مستخدمي اللعبة في مسابقة nevertable
لتنصيب اللعبة استخدم مدير الحزم synaptic أو أداة زيادة وحذف وابحث عن كلمة neverball وكلمة neverputt لإضافة اللعبة وستجد اللعبتين في قائمة تطبيقات > ألعاب .. أو انسخ في الطرفية
sudo apt-get install neverball neverputt
لعبة neverball
لعبة neverputt
ubuntu in arabic 